Exhibicija modernego uměnija

Details

Kategorija: KULTURA - RELIGIJA - HISTORIJA

Datum: Petek, 10 Februar 2012 09:04

Čitanja: 10205

 Exhibicija modernego uměnija. Praga 02/2012, Palac Koruna. Vaclavska plošča.

Iz početka 2012 , v tečeniji několika dnov je proišla exhibicija modernego češskego uměnija v palacu Koruna, stoličny grad Praga.

Jednim iz umětnikov imajučim v palacu Koruna exhibiciju svojih dělj je byl mlady češsky umětnik iz grada Litomyšl, izhodna Čehija, ... Jan Ryšan.

Jan jest jednim iz čitatěljev internetovih novin Izviestija a prijatělj medžuslověnskej komunikacije a věro-dostojno p'rvy umětnik, ktory je upotrěbil medžuslověnsky jazyk na svojej exhibiciji. Svoju biografiju je prezentoval ni na českem ni anglicskem jazyku no je byla napisana na medžuslověnskem.

Jan Ryšan bieše roděny v magičny den 4.4. 1974 v
izhodnih Čehah, v gradu zvanim Litomyšl. Rovnako kako mnogo mladih
ljudij v jih lětah dorastenija, imaše različne problemy s okolnim
světom, drugimi ljudimi no glavno sam s seboj. Iz pričin tutih
problemov, duševnego t'rpěnija i mučivej těgoty realnego žitija,
obratiše svoj pogled k hudožstvu. Izp'rva pisaše poemy, no v kratkem
sledu načneše č'rtati obrazy i rysovati različne skice. Zanurjanije v
hudožnu tvorbu a duševny svět pomagaše jemu prehoditi vse problemy i
takože uspěšno izv'ršiti ove těžke mlade lěta.

Bezpreryvno, p'lny odvagy objaviti i razuměti realnemu světu, otideše
iz svojego rodnego grada v stolicu Pragu, kdie načneše studovati Fakultu
arhitektury i budovanija Češskego Vysokego Učenija Tehničskego (Pražsky
ČVUT).

Multikulturny grad Praga razšireše jego kulturni v'gleděnija. V sih
vremenah učiniše několiko putovanijej v različne zagranične d'ržavy i
krajiny. Posle zav'ršenija fakulty otideše za Atlantik, kdie načneše
svoje žitije i rabotu v gradu Chicago, USA.

Iz tutih zagraničnih vremen jestvuje několiko-lětna fotografičska
rabota izobrazujuča vsjakodnevne žitije prostih ljudij vsih ras i
narodov žijučih v Chicagu i jego širejšej okolině. No v tečeniji dnov,
jego glavny interes běše o mnogo više vazhvačen v rysovanije obrazov.

V sledu rastěnija jego životnih izkušenijej takože rastehu jego
umětničske v'gledenija i nazrenija, ktore běhu postepno vlyvany v jego
obrazitelske ryso-tvorenije.

Jan više preferuje duševno-emočne izraženije svojih obrazovih dělj,
neželi jih realne popisanije. Emočne izraženije jego obrazov jest
p'rvotnim celjem i naměrenijem komunikacije s drugimi ljudimi. Prečesto
jest na drugih ljudih, da by predstavili sebě značenije i mněnije jego
obrazov v s'vezaniji s svojimi osobnimi životnimi izkušenijami.

Jan č'rtaje svoje obrazy imajuč radost i veselije iz procesa jih
tvorěnija i naslednu satisfakciju iz dobrego dov'ršenija svojego děla.

Nap'lněnijem jego žitija ne jest toliko umětna rabota no takože opeka
o jego familiju i jego dom. Jan ima malego jedno-lětnego syna i
ljubovnu ženu.
Iz prijemnostij občinskego žitija, Jan ljubi razgovarjati s družinoj
dobrih ljudij u vkusnego češskego piva ili moravskego vina, takože jest
prijateljem medžunarodnego slověnskego dialoga i ljubi čitanije
internetovih novostij IZVIESTIJA.info pisanih v medžuslověnskem jazyku.

(ns)