Medžuslovjanski jezyk imaje viki!

Details: Kategorija: RAZLIČNE; Datum: Četvrtek, 10 Januar 2013 01:26; Čitanja: 19779

Article Index

Naše medžuslovjanske projekty imajut celu biblioteku knig i vebsajtov, forum i dvě grupy na Facebook, ale ješče jedna več jest nam potrěbna: viki. Sejčas imajemo ju na http://isv.wikinet.org/.

Tuta viki ne jest prěznačena specifičnomu projektu. Vsaki može v njej pisati v novoslověnskom, v slovjanskom ili v kakoj-libo drugoj formě medžuslovjanskogo. Važno, že byste pisali statije v medžuslovjanskom. Format jest osnovany na (dobro nam znajemoj) Vikipediji. Ogromnoju cennostju tutoj viki jest to, že možno bezposrědno linkovati k obrazam na http://commons.wikimedia.org/ i koristati vse obrazy, kotore takože koristaje Vikipedija.

Kake ješče sut cennosti takoj viki?

Prvo, često žali se, že v medžuslovjanskom jest malo k čitaniju, a točno to jest važno uslovije za uspěh umětnogo jezyka: že by ljudi imali k čitaniju v nim něčo interesnogo. Zvlašče v padě medžuslovjanskogo, tomu že ljudi ne učet se iz učebnikov ili gramatik, ale iz tekstov. Drugimi slovami, potrěbne sut teksty, najlěpěj o vsěh možnyh temah. Izviestija.info jest fantastično žrlo, ale novosti v istoj hvilji už ne sut novosti i togda tratet svoju aktualnost. Kromě togo, ne vsaki tekst podhodi dobro v formatě novostij. Format enciklopedije pozvaljaje nam pisati informacijne statije o temah, kotore nas interesujut.
Prag jest nizki: vsaki može praviti vsaku statiju. Takim sposobom možemo takože eksperimentovati s različnymi formami medžuslovjanskogo. Kto doprva uči se medžuslovjanskogo, imaje možnost praktikovanija i vsěgda može prositi drugih, že by popravili mu jezyk.
Ako li tuta viki uspěje, može v budučosti služiti kako osnova za pravdivu Vikipediju na medžuslovjanski.

Bukvy isv (od «Interslavic») sut prědlagajemy kod ISO 639-3 za medžuslovjanski. Za tutu viki jesm obrabotal kompromisnu formu jezyka, osnovanu na raznyh projektah, ale glavno na novoslověnskom i slovjanskom. Na toj jezyk jesm takože prěvodil množinstvo sistemnyh tekstov. Prikladom jest tuta statija, kotora takože sodrživaje kratku gramatiku.

Ideja medžuslovjanskoj vikipedije ne jest nova. Gabriel Svoboda jest založil v 2007 godě «Slovianska Viki», napisajemu izključiteljno v Slovianski-P. Od 2009 sut takože viki v jezykah slovioski i slovianski. Tomu že Wikia jest mnogo izměnila svoj izgled, težko jest v nih rabotati, a nijedin iz těh projektov ne stal sukces. V 2011 jestvovala kratko viki pod adresom http://medzuslovjanski.slavopedia.com - oběčajuči projekt, kotory na žalost poslě několikih měsecah izčeznul vslěd tehničnyh problemov, ne ostavjajuč slěda.

Priglašajemo vsěh k čitaniju, pravjeniju i pisaniju na http://isv.wikinet.org/!

Меджусловјански језык имаје вики!

Наше меджусловјанске пројекты имајут целу библиотеку книг и вебсајтов, форум и двѣ групы на Facebook, але јешче једна веч јест нам потрѣбна: вики. Сејчас имајемо ју на http://isv.wikinet.org/.

Тута вики не јест прѣзначена специфичному пројекту. Всаки може в ньеј писати в новословѣнском, в словјанском или в какој-либо другој формѣ меджусловјанского. Важно, же бысте писали статије в меджусловјанском. Формат јест основаны на (добро нам знајемој) Википедији. Огромноју ценностју тутој вики јест то, же можно безпосрѣдно линковати к образам на http://commons.wikimedia.org/ и користати все образы, которе такоже користаје Википедија.

Каке јешче сут ценности такој вики?

Прво, често жали се, же в меджусловјанском јест мало к читанију, а точно то јест важно условије за успѣх умѣтного језыка: же бы льуди имали к читанију в ним нѣчо интересного. Звлашче в падѣ меджусловјанского, тому же льуди не учет се из учебников или граматик, але из текстов. Другими словами, потрѣбне сут тексты, најлѣпѣј о всѣх можных темах. Izviestija.info јест фантастично жрло, але новости в истој хвильи уж не сут новости и тогда тратет своју актуалност. Кромѣ того, не всаки текст подходи добро в форматѣ новостиј. Формат енциклопедије позвальаје нам писати информацијне статије о темах, которе нас интересујут.

Праг јест низки: всаки може правити всаку статију. Таким способом можемо такоже експериментовати с различными формами меджусловјанского. Кто допрва учи се меджусловјанского, имаје можност практикованија и всѣгда може просити других, же бы поправили му језык.

Ако ли тута вики успѣје, може в будучости служити како основа за правдиву Википедију на меджусловјански.

Буквы isv (од «Interslavic») сут прѣдлагајемы код ISO 639-3 за меджусловјански. За туту вики јесм обработал компромисну форму језыка, основану на разных пројектах, але главно на новословѣнском и словјанском. На тој језык јесм такоже прѣводил множинство системных текстов. Прикладом јест тута статија, котора такоже содрживаје кратку граматику.

Идеја меджусловјанској википедије не јест нова. Габриел Свобода јест заложил в 2007 годѣ «Словианска Вики», написајему изкльучительно в Словиански-П. Од 2009 сут такоже вики в језыках словиоски и словиански. Тому же Wikia јест много измѣнила свој изглед, тежко јест в них работати, а ниједин из тѣх пројектов не стал сукцес. В 2011 јествовала кратко вики под адресом http://medzuslovjanski.slavopedia.com - обѣчајучи пројект, которы на жалост послѣ нѣколиких мѣсецах изчезнул вслѣд техничных проблемов, не оставјајуч слѣда.

Приглашајемо всѣх к читанију, правјенију и писанију на http://isv.wikinet.org/!

NAJČITAJEME ČLANKY